SEMANA DO DÍA DO LIBRO

 

Con motivo do Día do Libro, no noso centro vivimos unha xornada moi especial chea de aprendizaxe, convivencia e amor pola lectura.

Comezamos cunha interesante actividade organizada polos voluntarios da biblioteca, que nos guiaron nun percorrido pola evolución da escritura ao longo da historia. A través dunha presentación apoiada no PDI do centro, descubrimos como xurdiron as primeiras formas de escritura, os materiais empregados en distintas épocas e como foron evolucionando os libros ata chegar aos formatos actuais. Foi unha actividade moi enriquecedora que espertou a curiosidade do alumnado e nos axudou a valorar a importancia da palabra escrita como ferramenta de comunicación e coñecemento.

Ademais, celebramos unha das actividades máis entrañables da semana: o apadriñamento lector. Nesta experiencia, o alumnado dos cursos inferiores compartiu lecturas cos maiores, creando momentos de encontro, aprendizaxe e gozo arredor dos libros. Os padriños e madriñas lectoras acompañaron, leron e animaron aos seus compañeiros e compañeiras, fortalecendo os lazos entre niveis e fomentando o gusto pola lectura dun xeito próximo e motivador.

Foi unha xornada para lembrar, na que comprobamos que os libros non só nos ensinan, senón que tamén nos unen.

Seguimos medrando como comunidade lectora!